القاضي الموزمبيقي ....(((( قصة طريفة)))).......

قاضي يحكي ماساته مع التعيين ...


سهم يحتسي فنجانا من القهوة ... بعدما مل من كثرة النوم ...واذ بامي رعاها الباري ...

تاتيني مستبشره تقول ياوليدي اليوم جت جارتنا ام دحيم تقول ولدها راح
يقدم بالشرطه ياوليدي رح قدم معاه

لا وتقول ام دحيم انهم بيعطونه راتب 5000 ريال وانت ياوليدي ذبحك الفقر عندي ... امي الله يهديك انا جامعي وابلقى وظيفه زينه...

الوكاد ان دحيم الله يستر علينا وعليه هلحين توظف وتزوج وعنده ولد

فاتخذت قراري :

بينما اقطع البصل مع امي لاعداد الغداء... امي وش اخبار ام دحيم ؟؟

والله ام دحيم تكبرت علينا من يوم ولدها صار جندي بالشرطه وهي

معطيتنا بوز(شلوتي)
ودايما تقول ولدي احسن من ولد ام سهم (اللي هو انا)
شوفوه متركي عندها لاشغل ولاعمل...

قلت يمه تكفين رجعي العلاقه معاها عشان دحيم يتوسط لي عندهم بالشرطه ...
عاد ياحول الوالده رافة بي لما ترى من مماطلات المجلس قالت والله يوليدي لاجل عين تكرم مدينه ...وضبطت الاوضاع مع ام دحيم...

وابشركم دحيم اخذ ملفي وقال لي يومين ويطلع قرارك وفعلا من بكره دق علي وقال زي الصاروخ تجيب بدلتك بنطلع انا وانت دورية...

الله يبشرك بالخير ..متى امداهم يطبعون القرار ...يابن الحلال مايحتاج ....الاجراءات الروتينية بس بالمجلس.... هالخرابيط مهي بعندنا...
وامي تطق هاكالزغروط اللي كاد ان يسقط السطح بسببه علينا...

بس يادحوم من وين البدله؟؟
ماعندي قال يابن الحلال خذ بدلة الموزمبيقي حق مزرعتكم ..

وفعلا صرت موظف محترم وكل من سالني قلت له بالشرطه وبدت العزايم والناس تقرب لي ...تخبرون القسايم دبل يعني اذا تعرف العسكري ارفع خشمك وقطع الاشارات وبهذل العالم ...

وصارت امي وام دحيم اطلق شنبات بالحاره ولا احد يرفع عينه عليهن... ..

وفي يوم من الايام بعد ماوصلت رتبة رقيب اول يعني بعد (15) سنة دق علي رقم 012022222قلت ياكافي وش السالفه المهم وارد

الا يطلع لي واحد يتثاؤب ونصه نوم ..

قال الاخ سهم قلت نعم اي خدمه قال معاك وزارة الشؤون البلدية والقرويه..حياك الله!! بشر عسى طلعت ارضي اللي قدم عليها ابوي لي يوم ولدت ..لوسمحت خلني اكمل كلامي!! ... تفضل ... يااخي هذي شعبة القضاة بوزارة الشؤون البلدية والقروية ... طيب خابرها تتبع المجلس البلدي قصدي مجلس القضاء ...اييييييييه يالحبيب مادريت ان الشعبة انتقلت للبلديات بسبب تكدس المعاملات عندهم وتاخر التعيينات ...... طيب وانا وش مصلحتي ...
والله يالطيب بس قرارك طبعناه وباقي توقيع كاترين ساموني ... ووشي هذي خبز صامولي...هذي وزيرة العدل بدولة موزمبيق ..

طيب وش علاقتها بالموضوع ..
لا ابدا بس بيننا وبينهم تعاون في الشؤون القانونية والقضائية ولازم تمر عليهم ... قلت احلق رمشي اذا جيتكم ....
رقيب اول ويروح للقضاء هذا مهبول ...شوي الا جاني العامل الموزمبيقي ...امممييي (عمي) انا تبغى تروه موقمبيق سوف ولد انا خمس طعس شنه ماتروح ...تهي تهي ...حزني ... قلت ابشر بعزك ياابو مصباح الدجى...اخذت العامل للرياض اخلص اوراقه بالجوازات ... ومرينا البلدية سددنا غرامات ...قلت فرصه ياسهم تاخذ القرار تشوف شكله... لايشغلونك كل يوم داقين ...
اخذت القراروكنت باجدعه باول زباله(الله يكرمكم) .. والا عاملنا الموزمبيقي بيروح اجازة قلت فرصه...ياشفيق ولاعليك امر ... خذ معك القرار ووقعه من عند كرتون صابون ماادري خبز صامولي...
وجيبه معاك لارجعت...
الرجال ماقصر وقفة رجال اسبوعين الا هو جايبه...

قلت الله لايهينك ياسيد شفيق الرحمن تاج الملوك -اسم عاملنا-دامك بالرياض مر على شعبة القضاة بوزارة الشؤون البلدية وعطهم اياه ...
الربع يوم جاهم يحسبونه انا... قالو حياك الله... وينك من زمان..الطيور طارت بارزاقعا ... مابقى الامحكمة الخرخير....

دق علي شفيق وقال امممي (عمي) انا هطيتو كرار اند متوع هقو بلديه......
قلت بيض الله وجهك عاد لو تخدمني خدمه بسيطه وتبقى بالرياض لين ينطبع القرار كلها يومين .....
مافي مسكله امممي ....طبعا انا نسيت الموضوع لاني عارف انه بيطووووول... شعبة القضاة يوم صاروا تبع البلدية بدت الناس تشتغل صح ..وبيومين والتوجيه جاهز...
( الى الان يحسبون العامل هو سهم صاحب القرار)...

قالو له يافضيلة الشيخ لك سياره وسواق خاص وهذا البشت والعود وعذرا على القصور -مش علشان سواد عيونه عشانه بالخرخير- الرجال ماصدق خبر ... ركب البانوراما وبغى يطلع البكت(الدخان)يطق له سجاره بس تذكر انه قاضي ..
شفيق اول ماطلع من الرياض الا الامور على غير مايتمنى ...
نزلوه من السياره وركبوه بصندوق سيارة البلديه-ميتسوبيش ديزل 82-وقالوا له الغماره مليانه معاملات نخاف تطير مع الهواء...
شفيق بدا يسب ويلعن اليوم اللي راح فيه للشعبه ولعن نفسه ولعن الميتسوبيشي ولعن بعير مرو من جنبه ..

بعد يومين وصلو الخرخير بالسلامه..
انا نسيت الوضوع ونسيت شفيق ...جتني بعثه لفرنسا ..وبعدها عينت ضابط في الامن وصار دحيم السواق حقي ...طبعا امي هبلت بام دحيم ... مخليتها الجاريه حقتها ...

شفيق اول ماوصل الخرخير قال للسواق ايش هذا .... هذي الخرخير وهذا بعير تداوم عليه للمحكمه... ويفتل السواق شنباته..
شفيق قال ايش كركير... موقمبيق اهسن ... ويغمى عليه ....

طبعا الى ذاك اليوم والتامين الصحي لم يعتمد للقضاه...ودوه(ذهبوا به) لعجوز تعالج بالكي وشفي بحمدالله ...وصار الصباح بالمحكمه والعصر يرعى غنم العجوز.... تعرض شفيق لاطلاق النار ومحاولة الاغتيال من اشخاص مجهولين 23مره والى ذاك اليوم ولم يصرف للقضاة بدل امن ولا بدل مقابلة جمهور...
المهم ان الرجال اثبت وجوده-وبالواسطه غير اسمه والجنسيه وصار اسمه عبدالعزيز بن محمد الخرخيري نسبة الى الخرخير- وصارت له سمعه قويه لذلك تم ترقيته الى قاضي استئناف ... ومااخذ سنتين الا هو مدير شعبة القضاة .. واستطاع ان يعيد الشعبة الى المجلس ... ولجدارته وعمله المميز ...
تم تعيينه رئيسا للمجلس الاعلى عام 1460 - تستاهل ياشفيق - الرجل عمل اصلاحات خيالية خلال فترة لاتتجاوز ستة اشهر ..وفي يوم من الايام وهو يراجع بعض المعاملات المكدسه من عام 1430هـ يعني من قبل ثلاثين سنه ...
ويلقى قائمة اسماء مكتوب على اعلى الصفحه الدفعات المنكوبه...
وهو يتصفح الاسماء وجد اسم سهم ...ياشفيق(تمتو هونقا كاي ..كبيكا هونقا آرو سيكا)شفيق يكلم نفسه باللغة الاصلية ...
الترجمه ( هالاسم موبغريب عليك ياشفيق ...حاس ان الاسم مر عليه...)


وينادي السكرتير ....
سم ياشيخ عبدالعزيز قال بالله سوف احممم شوف لي هالاسم ايش وضعه بسرعه لوسمحت... بس ياشيخ الملازمين الجدد برا جايين للمقابله ... ايه دخلهم ولاتنسى اللي قلت لك عليه ...

وبعد البحث...هذا يافضيلة الشيخ عبدالعزيز(شفيق سابقا) قرار احد الملازمين صدر عام 1345وباشر بالخرخير (شفيق تنحنح وحس بغصه) ططططط طيب ....
عادت الذاكره بشفيق الى تلك الايام وتذكر ان كفيله سهم لايزال ينتظر القرار ... فاخذته الشفقه وتناول القلم ليخط ذلك القرار

(وفي اعلاه عاجل للاهمية)

بتعيين سهم الامس ملازما قضائيا في موزمبيق
-تبادل خبرات شفيق عندنا وسهم عندهم-

توقيــــــــــــــع

فضيلة رئيس المجلس الشيخ عبدالعزيز بن محمد الخرخيري...

جوال سهم رررننننننن رررررنننننن سهم يرد نعم معاك المقدم متقاعد سهم اي خدمه...سم طال عمرك...معك المجلس ...اي مجلس ...القضاء ... حياك الله اي خدمه ...طال عمرك رئيس المجلس يسلم عليك ويقول لك شفيق جاء من موزمبيق ...اصابني دوار.... سقط الجوال من يدي الوووو الووووووو ...
سهم ثقل لسانه ولم تعد تحمله قدماااااااااه ...اخذته الذاكره الى ذلك اليوم الذي كان جالسا مع عائلته في المنزل يتابعون الاخبار.....
بدا يضحك بحالة هستيرية عندما رآى رئيس المجلس وكان يشبه شفيق ...
اما اليوم فقد تاكد انه هو بلا شك ....


لحظات وتهبط الطائرة في مطار الملك خالد الدولي بالرياض ...

وفي صالة كبار الزوار كان شفيق بانتظار سهم وما ان التقت عينا شفيق بعيني سهم ... واذ بشفيق ينادي سهم امممممممممي (عمي)
اخذت سهم نوبة بكاء مختلط بضحك ... لمـا رآى شفيق في استقباله ومعه حاشيته ...

طار عقله واصبح يهذي ويركض في المطار كالمجنون... ومازال يجري في المطار حتى اقترب من مدرج الهبوط فكانت نهايته (سحلا) تحت كفرات طائرة الخطوط الموزمبيقية التي اتت لنقله الى محكمة موزمبيق العامه ...

.....تمت....